الدجاج بطريقة تجنن وعن تجربة

من طرف **نورا شاهين** الخميس 17 يناير 2013, 10:11 pm

ايه رأيكو جبتلكو بقا النهاردة طريقة انا عملتها وطلعت تحفة وكل مكوناتها موجودة عندنا فى المطبخ :
المقادير :
فرخة وسط مقطعة 4
اربع بصلات كبارمقطعين حلقات رفعية اوى
نص راس ثوم كبيرة متفصصة ومتقطعة حلقات مش مفرومة
نص معلقة شاى فلفل اسود
معلقة شاى بهارات
نص معلقة كمون
معلقة شاى نعناع ناشف
ملح حسب الرغبة
تلات حبات حبهان فصصى الحببات اللى بتبقى جواهم واطحنيهم بدهر المعلقة
ورقتين لورا بلاش تكترى اكتر من كدة علشان ماتعملش مرارة
تلات معالق كبيرة سمن او زبدة
الطريقة :
هاتى حلة كبيرة وحطى فيها الزبدة وارفعيها على النار ولما تسيح وتقدح حطى فيها الفراخ نية وحمريها فها لحد ماتلاقها اخدت اللون الذهبى الغامق
وخلى بالك يا اما تعملى الاكلة فى طاسة تفال كبيرة علشان الفراخ مش تلزق او انك تعمليها فى حلة تكون تيفال .. او حلة الومنيوم بس تراعى ان الفراخ ماتلزقش منك
بعد ما تحمريها ضفى عليها التوابل كلها ماعدا الملح وسيبى التوابل بردو دقيقة فى السمن تتحمر وبعد كدة حطى على الفراخ كوباية مية كبيرة
وبعدها ضيفى البصل والثوم وغطى الحلة وخلى النار متوسطة
تابعيها وهى على النار وكل ما تحسى انها لسة محتاجة ميا علشان تستوى زودى بس بمقدار قليل ولما تقرب الفراخ على اكتمال السوا حطى الملح حسب الرغبة
وسيبى الفراخ على النار لحد ما تستوى والصوص بتاعها يتقل
ممكن تقدبمها مع رز ابيض وسلطة خضرا
ياللا جربوها وقولولى رأيكو